Sport

Ndahet nga jeta një nga emrat më të famshëm të sportit botëror të viteve '80! Akuzat për vrasje dhe koha në burg

O.J. SImpson, një nga emrat më të njohur të sportit botëror dhe jo vetëm në vitet 1980-1990, është ndarë nga jeta në moshën 76-vjeçare pasi humbi betejën e tij me kancerin.

Orenthal James Simpson

Redaksia 11 Prill, 17:53 | Përditesimi: 11 Prill, 18:01

Orenthal James Simpson, një nga emrat më të njohur të sportit botëror dhe jo vetëm në vitet 1980-1990, është ndarë nga jeta në moshën 76-vjeçare pasi humbi betejën e tij me kancerin. Lajmin e dha familja e ish-sportistit dhe aktorit, i cili përtej famës në ekran në role të tilla, mori edhe nga ngjarja e bujshme e vdekjes së ish-bashkëshortes së tij dhe të dashurit të saj.

Familjarët bënë të ditur se ai ishte ndarë nga jeta i rrethuar nga nipat dhe stërnipat, ndërsa i kërkuan mediave privatësi për ceremoninë funebre të një personazhi që bëri bujë në mënyra të ndryshme.

Ai ishte një kampion i jashtëzakonshëm i futbollit amerikan, duke shkëlqyer në NFL me skuadrat e San Francisko 49ers dhe Buffalo Bills, teksa ndërmori më pas rolin e aktorit në disa filma të ndryshëm. Simpson po kthehej në një personazh të famshëm televiziv pasi u largua nga sporti, kur ndodhi ngjarja e bujshme e qershorit 1994, kur ish-bashkëshortja e tij, Nikol Braun Simpson dhe miku i saj, Ronald Goldman, u gjetën të vrarë jashtë apartamentit të tyre.

LEXO EDHE:
FBI: Mashtruesit vodhën mbi 3.4 miliardë dollarë nga amerikanët e moshuar në 2023

Simpson u shpall në kërkim, pasi ai më parë ishte akuzuar nga ish-bashkëshortja se e kishte dhunuar, shkak për të cilin palët kishin divorcuar. Por në vend që të dorëzohej në polici, ai u mundua t’i arratisej me makinë forcave të rendit dhe ndjekja e tij në rrugët e qytetit ishte një nga ngjarjet më të ndjekura televizive në SHBA, me mbi 95 milionë shikues.

Arrestimi dhe gjyqi i tij më pas u kthyen në një shfaqje po aq të madhe televizive, nga e cila O.J. Simpson doli i pafajshëm për të dy vrasjet. Megjithatë, tre vite më vonë, familjarë e viktimave hapën një çështje civile kundër tij duke e shpallur fajtor, për t’u zhdëmtuar për 33.5 milionë dollarë. Ai kaloi thuajse 9 vite në burg me akuzën e rrëmbimit, vjedhjes dhe shkeljeve të tjera në një skemë mashtrimi me materiale sportive, duke dalë nga burgu në vitin 2017.